ವಾಷಿಂಗ್ಟನ್ (ಏ.24): ಅಮೆರಿಕದಲ್ಲಿ ಕೊರೋನಾ ವೈರಸ್ ನಿಯಂತ್ರಣಕ್ಕೆ ಬರುತ್ತಿಲ್ಲ. ಈಗಾಗಲೇ ಅಲ್ಲಿ 50 ಸಾವಿರಕ್ಕೂ ಅಧಿಕ ಮಂದಿ ಕೊರೋನಾಗೆ ಮೃತಪಟ್ಟಿದ್ದಾರೆ. ಸಾಕಷ್ಟು ಸಂಶೋಧಕರು ಇದಕ್ಕೆ ಔಷಧಿ ಕಂಡು ಹಿಡಿಯುವುದರಲ್ಲಿ ತೊಡಗಿದ್ದಾರೆ ಈ ಮಧ್ಯೆ ಕೊರೋನಾ ನಾಶಕ್ಕೆ ಡೊನಾಲ್ಡ್ ಟ್ರಂಪ್ ನೀಡಿದ ಸಲಹೆ ಕೇಳಿ ವೈದ್ಯರೇ ಕಂಗಾಲಾಗಿದ್ದಾರೆ.
ಈ ಬಗ್ಗೆ ಶ್ವೇತ ಭವನದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಡೊನಾಲ್ಡ್ ಟ್ರಂಪ್, ವೈದ್ಯರಿಗೆ ವಿಚಿತ್ರ ಸಲಹೆಗಳನ್ನು ನೀಡಿದ್ದಾರೆ. “ಕೊರೋನಾ ವೈರಸ್ ಬಂದ ವ್ಯಕ್ತಿಯ ದೇಹದ ಒಳಗೆ ಸೋಂಕು ನಿವಾರಕವನ್ನು ಸೇರಿಸಿ. ಇದರ ಜೊತೆಗೆ ಅಲ್ಟ್ರಾವಯಲೆಟ್ ಕಿರಣ ಹಾಯಿಸುವ ಮೂಲಕ ವೈರಸ್ ಸಾಯಿಸಿ,” ಎಂದು ಟ್ರಂಪ್ ಸೂಚನೆ ನೀಡಿದ್ದಾರೆ.
ಟ್ರಂಪ್ ಮಾತನಾಡುವುದಕ್ಕೂ ಮೊದಲು ಮಾತನಾಡಿದ್ದ ಹೋಮ್ಲ್ಯಾಂಡ್ನ ವಿಜ್ಞಾನ ಹಾಗೂ ತಂತ್ರಜ್ಞಾನ ಸಲಹೆಗಾರ ವಿಲಿಯಮ್ಸ್, “ಅಲ್ಟ್ರಾವಯಲೆಟ್ ಕಿರಣಗಳು ಕೊರೋನಾ ವೈರಸ್ ನಾಶ ಮಾಡುವ ಶಕ್ತಿ ಹೊಂದಿವೆ, ಬ್ಲೀಚ್ ಐದು ನಿಮಿಷಗಳಲ್ಲಿ ವೈರಸ್ ನಾಶ ಮಾಡುತ್ತದೆ. ಶುದ್ಧ ಆಲ್ಕೋಹಾಲ್ ಒಂದು ನಿಮಿಷದಲ್ಲಿ ರೋಗಕಾರಕಗಳನ್ನು ನಾಶ ಮಾಡುತ್ತವೆ,” ಎಂದು ಹೇಳಿದ್ದರು. ಇದಾದ ನಂತರದಲ್ಲಿ ಟ್ರಂಪ್ ಈ ರೀತಿಯ ಹೇಳಿಕೆ ನೀಡಿದ್ದಾರೆ.
ಟ್ರಂಪ್ ಹೇಳಿಕೆ ಕುರಿತು ಕೆಲ ವೈದ್ಯರು ಆತಂಕ ವ್ಯಕ್ತಪಡಿಸಿದ್ದಾರೆ. ಯುವಿ ಕಿರಣಗಳನ್ನು ದೇಹದ ಒಳಗೆ ಹಾಯಿಸುವುದು ತುಂಬಾನೇ ಅಪಾಯಕಾರಿ. ಈ ರೀತಿ ಆಲೋಚನೆ ಮಾಡುವ ಬದಲು ಹೆಚ್ಚೆಚ್ಚು ಜನರನ್ನು ಪರೀಕ್ಷೆಗೆ ಒಳಪಡಿಸುವುದು ಉತ್ತಮ ಎಂದು ವೈದ್ಯರು ಸಲಹೆ ನೀಡಿದ್ದಾರೆ.
