ನವದೆಹಲಿ(ಏ. 24): ಕೊರೋನಾ ಪತ್ತೆಗೆ ಟೆಸ್ಟ್ ಕಿಟ್ಗಳು ನಿತ್ಯವೂ ಆವಿಷ್ಕಾರಗೊಳ್ಳುತ್ತಿವೆ. ಕೊರೊನಾ ಪರೀಕ್ಷೆಯ ರಿಸಲ್ಟ್ಗಾಗಿ ಮೊದಮೊದಲು ವಾರಗಟ್ಟಲೆ ಕಾಯಬೇಕಾಗಿತ್ತು. ಈಗ ಕೆಲವೇ ಗಂಟೆಯಲ್ಲಿ ಫಲಿತಾಂಶ ಲಭ್ಯ ಸಾಧ್ಯವಾಗಿದೆ. ಆದರೆ, ಐಐಟಿಯ ಪ್ರೊಫೆಸರ್ವೊಬ್ಬರು ಐದೇ ಸೆಕೆಂಡಲ್ಲಿ ಫಲಿತಾಂಶ ನೀಡುವ ತಂತ್ರಜ್ಞಾನ ಆವಿಷ್ಕರಿಸಿರುವುದಾಗಿ ಹೇಳಿಕೊಂಡಿದ್ದಾರೆ. ಉತ್ತರಾಖಂಡ್ನಲ್ಲಿರುವ ರೂರ್ಕಿಯ ಐಐಟಿಯಲ್ಲಿ ಸಿವಿಲ್ ಎಂಜಿನಿಯರಿಂಗ್ ಪ್ರೊಫೆಸರ್ ಕಮಲ್ ಜೈನ್ ಅವರು ಕೋವಿಡ್ ಪತ್ತೆ ಪರೀಕ್ಷೆ ಮಾಡುವ ಸಾಫ್ಟ್ವೇರ್ ಅಭಿವೃದ್ಧಿಪಡಿಸಿರುವುದಾಗಿ ಹೇಳಿದ್ದಾರೆ.
ಶಂಕಿತ ರೋಗಿಗೆ ಎಕ್ಸ್ರೇ ಸ್ಕ್ಯಾನ್ ಮಾಡಿದರೆ ಸಾಕು. ಕಮಲ್ ಜೈನ್ ಅವರ ಸಾಫ್ಟ್ವೇರ್ ಮಿಕ್ಕ ಪತ್ತೆದಾರಿ ಕೆಲಸ ಮಾಡುತ್ತದೆ. ರೋಗಿಯ ನ್ಯುಮೋನಿಯಾ ರೋಗಕ್ಕೆ ಕೋವಿಡ್ ಕಾರಣವೇ? ಅಥವಾ ಬೇರೆ ಸೋಂಕು ಇದೆಯೇ ಎಂಬುದನ್ನು ಈ ತಂತ್ರಾಂಶ ಕಂಡುಹಿಡಿಯಬಲ್ಲುದಂತೆ.
ಇದನ್ನೂ ಓದಿ: ಕೊರೋನಾ ನಾಶಕ್ಕೆ ದೇಹದೊಳಗೆ ಅಲ್ಟ್ರಾವಯಲೆಟ್ ಕಿರಣ ಹಾಯಿಸಿ; ಟ್ರಂಪ್ ಸಲಹೆಗೆ ವೈದ್ಯರೇ ಶಾಕ್
ಐಐಟಿ ಪ್ರೊಫೆಸರ್ ಅವರು ಈ ಸಾಫ್ಟ್ವೇರ್ ಅಭಿವೃದ್ಧಿಪಡಿಸಲು 40 ದಿನ ಬೇಕಾಯಿತಂತೆ. ಕಮಲ್ ಜೈನ್ ಅವರ ಈ ಆವಿಷ್ಕಾರಕ್ಕೆ ಇದೂವರೆಗೂ ಯಾವ ವೈದ್ಯಕೀಯ ಸಂಸ್ಥೆಯು ಮಾನ್ಯತೆ ಕೊಟ್ಟಿಲ್ಲ. ಆದರೆ, ಭಾರತೀಯ ವೈದ್ಯಕೀಯ ಸಂಶೋಧನಾ ಮಂಡಳಿ (ಐಸಿಎಂಆರ್) ಅವರ ಪರಾಮರ್ಶೆಗೆ ಇವರು ಕಳುಹಿಸಿದ್ಧಾರೆ. ಹಾಗೆಯೇ ತಮ್ಮ ತಂತ್ರಾಂಶಕ್ಕೆ ಪೇಟೆಂಟ್ ಪಡೆಯಲು ಅರ್ಜಿ ಹಾಕಿದ್ದಾರೆ.
“ಕೋವಿಡ್-19, ನ್ಯೂಮೋನಿಯಾ, ಕ್ಷಯ (Tuberculosis) ರೋಗಿಗಳ ಸುಮಾರು 60 ಸಾವಿರದಷ್ಟು ಎಕ್ಸ್ರೇ ಸ್ಕ್ಯಾನ್ಗಳ ದಾಖಲೆ ಸಂಗ್ರಹಿಸಿದೆ. ಎದೆಯಲ್ಲಿನ ಕಫದ ಪ್ರಮಾಣ (Chest congestion) ವನ್ನು ಗುರುತಿಸಲೆಂದು ಈ ಮೂರು ವಿಧದ ರೋಗಿಗಳ ಎಕ್ಸ್ ರೇ ಸ್ಕ್ಯಾನ್ ದಾಖಲೆ ಪಡೆಯಲಾಗಿದ್ದುದು. ನಂತರ ಈ ಎಲ್ಲಾ ದಾಖಲೆಗಳನ್ನು ವಿಶ್ಲೇಷಿಸಿ, ಕೃತಕ ಬುದ್ಧಿಮತ್ತೆ (AI) ಆಧಾರಿತ ಡೇಟಾಬೇಸ್ ತಯಾರಿಸಿಟ್ಟುಕೊಂಡೆ. ಅಮೆರಿಕದ ಎನ್ಐಎಚ್ ಕ್ಲಿನಿಕಲ್ ಸೆಂಟರ್ನ ಚೆಸ್ಟ್ ಎಕ್ಸ್ ರೇ ಡೇಟಾಬೇಸ್ ಕೂಡ ನಾನು ಅನಲೈಸ್ ಮಾಡಿದೆ” ಎಂದು ಕಮಲ್ ಜೈನ್ ಹೇಳುತ್ತಾರೆ.
ಇದನ್ನೂ ಓದಿ: Plasma Therapy – ಕೊರೋನಾ ರೋಗಿಗಳಿಗೆ ಪ್ಲಾಸ್ಮಾ ಥೆರಪಿ – ಉತ್ತಮ ಫಲಿತಾಂಶ ನೀಡಿದ ಪ್ರಯೋಗ: ಅರವಿಂದ್ ಕೇಜ್ರಿವಾಲ್
“ರೋಗಯ ಎಕ್ಸ್ ರೇ ಸ್ಕ್ಯಾನ್ ಮಾಡಿ ಆ ಚಿತ್ರವನ್ನು ಅಪ್ಲೋಡ್ ಮಾಡಬೇಕು. ಮಿಕ್ಕಿದ್ದನ್ನು ಸಾಫ್ಟ್ವೇರ್ ಅನಲೈಸ್ ಮಾಡುತ್ತದೆ. ಕೋವಿಡ್ ಸೋಂಕು ಇದೆಯಾ, ಸೋಂಕಿನ ತೀವ್ರತೆ ಎಷ್ಟಿದೆ, ಬ್ಯಾಕ್ಟೀರಿಯಾದಿಂದ ಸೋಂಕು ತಗುಲಿದೆಯೇ ಎಂಬಿತ್ಯಾದಿಯನ್ನು ಈ ಸಾಫ್ಟ್ವೇರ್ ಐದು ಸೆಕೆಂಡಲ್ಲಿ ವಿಶ್ಲೇಷಿಸಿ ರಿಸಲ್ಟ್ ನೀಡಬಲ್ಲುದು” ಎಂದು ಇವರು ಮಾಹಿತಿ ನೀಡಿದ್ಧಾರೆ.ಅಂದಹಾಗೆ, ಕಮಲ್ ಜೈನ್ ಅವರಂತೆ ವಿಶ್ವದ ಹಲವೆಡೆ ಸಾಫ್ಟ್ವೇರ್ ಅಭಿವೃದ್ಧಿಗೆ ಪ್ರಯತ್ನಗಳಾಗಿವೆಯಂತೆ. ಅಮೆರಿಕದ ಅಮೇಜಾನ್ ಯೂನಿವರ್ಸಿಟಿಯಲ್ಲಿ ಇಂತಹ ಪ್ರಯೋಗಗಳಾಗಿದ್ದರೂ ಯಾವುದೂ ಯಶಸ್ವಿಯಾಗಿಲ್ಲ ಎಂದು ಇವರು ಹೇಳಿಕೊಳ್ಳುತ್ತಾರೆ.
