ಬ್ರೆಸಿಲಿಯಾ: ಇಬ್ಬರ ಹೆಂಡತಿಯರ ಮುದ್ದಿನ ಗಂಡನನ್ನು ನೀವು ನೋಡಿರುತ್ತೀರ. ಆದರೆ, ಒಂದೇ ಸಮಯದಲ್ಲಿ ಇಬ್ಬರು ಹುಡುಗಿಯರನ್ನು ಮದುವೆಯಾಗುವುದನ್ನು ನೀವು ಎಲ್ಲಾದರೂ ಕೇಳಿದ್ದೀರ. ಬ್ರೆಜಿಲ್ ಹಾಗೂ ಬಾರ್ಸಿಲೋನಾ ಕ್ಲಬ್‌ನ ಮಾಜಿ ತಾರೆ ರೊನಾಲ್ಡಿನೋ ಇಬ್ಬರು ಪ್ರೇಮಿಗಳನ್ನು ಒಂದೇ ಸಮಯದಲ್ಲಿ ಮದುವೆಯಾಗುತ್ತಿದ್ದಾರೆ.
ಫುಟ್ಬಾಲ್‌ಗಳನ್ನು ಹಲವು ದಾಖಲೆಗಳನ್ನು ಮಾಡಿರುವ ಬ್ರೆಜಿಲ್ ಫುಟ್ಬಾಲ್ ಲೆಜೆಂಡ್ ರೊನಾಲ್ಡಿನೋ ಆಗಸ್ಟ್‌ ತಿಂಗಳಲ್ಲಿ ಪ್ರಿಸ್ಸಿಲಾ ಕೊಯೆಲೊ ಹಾಗೂ ಬೀಟ್ರಿಜ್ ಸೌಜಾರನ್ನು ವಿವಾಹವಾಗುತ್ತಿದ್ದಾರೆ. ಇನ್ನು, ಇವರು ಒಂದೇ ಸಮಯದಲ್ಲಿ ಮದುವೆಯಾಗುತ್ತಿದ್ದಾರೆ ಎಂದು ಬ್ರೆಜಿಲ್ ಮಾಧ್ಯಮಗಳು ವರದಿ ಮಾಡಿವೆ. ಅಲ್ಲದೆ, ಕಳೆದ ಡಿಸೆಂಬರ್‌ನಿಂದ ಇಬ್ಬರೂ ಯುವತಿಯರು ಸಾಮರಸ್ಯದಿಂದ ರೊನಾಲ್ಡಿನೋ ಜತೆಗೆ ರಿಯೋ ಡಿ ಜನೈರೋನ ಬಂಗಲೆಯಲ್ಲಿ ವಾಸ ಮಾಡುತ್ತಿದ್ದಾರೆ.
ಕೇವಲ ಒಟ್ಟಿಗೆ ಮದುವೆಯಾಗುವುದಷ್ಟೇ ಅಲ್ಲ, ಒಂದೇ ಸಮಯದಲ್ಲಿ ಒಂದೇ ರೀತಿಯ ಉಡುಗೊರೆಗಳನ್ನು ಇಬ್ಬರು ಯುವತಿಯರಿಗೆ ಮಾಜಿ ಫುಟ್ಬಾಲ್ ಸ್ಟಾರ್ ನೀಡುತ್ತಿರುತ್ತಾನಂತೆ. ಇತ್ತೀಚೆಗೆ ಹೊರ ದೇಶಕ್ಕೆ ಟ್ರಿಪ್‌ಗೆ ಹೋದಾಗ ರೊನಾಲ್ಡಿನೋ ಇಬ್ಬರಿಗೂ ಒಂದೇ ರೀತಿಯ ಪರ್ಫ್ಯೂಮ್ ನೀಡಿದ್ದ ಎಂದು ತಿಳಿದುಬಂದಿದೆ. ಅಲ್ಲದೆ, ಇಬ್ಬರಿಗೂ ಇಂತಿಷ್ಟು ಸಮಯಕ್ಕೆಂದು 1,500 ಪೌಂಡ್‌ನಷ್ಟು ಹಣವನ್ನು ನೀಡುತ್ತಾನೆ ಎಂದು ಗೊತ್ತಾಗಿದೆ.
ಇನ್ನು, ಈ ವಿವಾಹವನ್ನು ಮಾಜಿ ಫುಟ್ಬಾಲ್ ಸ್ಟಾರ್ ಸೋದರಿ ವಿರೋಧ ವ್ಯಕ್ತಪಡಿಸಿದ್ದು, ಮದುವೆಗೆ ಗೈರು ಹಾಜರುಗುವುದಾಗಿ ತಿಳಿಸಿದ್ದಾಳೆ. ಆದರೆ, ಹಲವು ಸೆಲೆಬ್ರಿಟಿಗಳು ಇದಕ್ಕೆ ಬೆಂಬಲ ನೀಡಿದ್ದು, ಮದುವೆಗೆ ತಾವು ಹೋಗುವುದಾಗಿ ಸ್ಪಷ್ಟನೆ ನೀಡಿದ್ದಾರೆ. ರಿಯೋದ ಬಾರ್ರಾ ಡ ಟಿಜುಕಾ ಜಿಲ್ಲೆಯ ಸಾಂಟಾ ಮೊನಿಕಾ ಕಾಂಡೋಮಿನಿಯಮ್‌ನಲ್ಲಿ ಖಾಸಗಿಯಾಗಿ ವಿವಾಹ ಸಮಾರಂಭ ನಡೆಯಲಿದೆ ಎಂದು ಬ್ರೆಜಿಲ್ ಮಾಧ್ಯಮಗಳು ಮಾಹಿತಿ ನೀಡಿವೆ.
