ಇತ್ತೀಚೆಗೆ ಮೃತಪಟ್ಟಿದ್ದ ತನ್ನ ತಂದೆಯನ್ನು ಸುಮಾರು 60 ಲಕ್ಷ ರೂಪಾಯಿ ($88,000) ಬೆಲೆ ಬಾಳುವ ಹೊಚ್ಚಹೊಸ ಕಾರಿನಲ್ಲಿ ಮಣ್ಣು ಮಾಡಿರುವ ಘಟನೆ ನೈಜೀರಿಯಾದ ಇಹಿಯಾಲಾದಲ್ಲಿ ನಡೆದಿದೆ.
ಅಝುಬುಕ್ ಎಂಬವವರು ಇತ್ತೀಚೆಗೆ ತನ್ನ ತಂದೆಯನ್ನು ಕಳೆದುಕೊಂಡಿದ್ದರು. ಅವರ ಅಂತಿಮ ಯಾತ್ರೆ ಸುಗಮವಾಗಿ ಸಾಗಲಿ ಎಂಬ ಉದ್ದೇಶದಿಂದ ಹೊಚ್ಚ ಹೊಸ ಬಿಎಂಡಬ್ಲ್ಯು ಕಾರನ್ನು ಖರೀದಿಸಿ ಕಾರು ಸಮೇತ ತನ್ನ ತಂದೆಯನ್ನು ಮಣ್ಣು ಮಾಡಿದ್ದಾರೆ.
ತನ್ನ ತಂದೆ ಸ್ವರ್ಗಕ್ಕೆ ಬಿಎಂಡಬ್ಲ್ಯು ಕಾರಿನಲ್ಲೇ ಹೋಗಲಿ ಎಂಬ ಉದ್ದೇಶದಿಂದ ಅದಕ್ಕೆ ಸ್ಯಾಟಲೈಟ್ ನ್ಯಾವಿಗೇಷನ್ ಸಿಸ್ಟಂನ್ನೂ ಅಳವಡಿಸಿದ್ದ ಎಂದು ಸ್ಥಳೀಯರು ತಿಳಿಸಿದ್ದಾಗಿ ಡೈಲಿಮೇಲ್ ವರದಿ ಮಾಡಿದೆ.
ನೈಜೀರಿಯಾದ ವ್ಯಕ್ತಿ ತನ್ನ ತಂದೆಗೆ ಈ ರೀತಿ ಭಿನ್ನವಾಗಿ ಅಂತಿಮ ಸಂಸ್ಕಾರ ನಡೆಸಿರುವ ಬಗ್ಗೆ ಸಾಮಾಜಿಕ ಮಾಧ್ಯಮಗಳಲ್ಲಿ ಸಿಕ್ಕಾಪಟ್ಟೆ ಚರ್ಚೆಯಾಗುತ್ತಿದೆ. ಇದಕ್ಕೆ ಸಂಬಂಧಿಸಿದ ಚಿತ್ರಗಳು ಸಾಮಾಜಿಕ ಮಾಧ್ಯಮದಲ್ಲಿ ಹರಿದಾಡುತ್ತಿವೆ.
ತನ್ನ ತಂದೆಯ ಆಸೆಯನ್ನು ಪೂರೈಸುವ ಸಲುವಾಗಿ ಅಝುಬುಕ್ 88,000 ಡಾಲರ್ ಕೊಟ್ಟು ಹೊಸ ಬಿಎಂಡಬ್ಲ್ಯು ಕಾರನ್ನು ಖರೀದಿಸಿದ್ದ. ತನ್ನ ತಂದೆಯನ್ನು ಕಾರು ಸಮೇತ ಮಣ್ಣಾಗಿಸುವ ಸಂದರ್ಭದಲ್ಲಿ ತೆಗೆದ ಫೋಟೋಗಳನ್ನು ಹಂಚಿಕೊಳ್ಳಲಾಗುತ್ತಿದೆ.
ಸುಮಾರು 6 ಅಡಿ ಆಳದ ಕಂದಕ ತೋಡಿ ಅದರಲ್ಲಿ ಮಣ್ಣು ಮಾಡಲಾಗಿದೆ.
ತನ್ನ ತಂದೆಯ ಆಸೆಯನ್ನು ಪೂರೈಸಲು ಮಗ ಮಾಡಿರುವ ಈ ಸಾಹಸಕ್ಕೆ ಸಾಮಾಜಿಕ ಮಾಧ್ಯಮದಲ್ಲಿ ವಿರೋಧವೂ ವ್ಯಕ್ತವಾಗಿದ್ದು, ನಾನಾ ರೀತಿಯಲ್ಲಿ ಪ್ರಶ್ನಿಸಿದ್ದಾರೆ. ಒಬ್ಬರಂತೂ ತಂದೆ ಬದುಕಿದ್ದಾಗ ಯಾಕೆ ಇವರು ಕಾರು ಖರೀದಿಸಿಕೊಡಲಿಲ್ಲ ಎಂದು ಕೇಳಿದ್ದಾರೆ. ಆಗ ಅವರ ಬಳಿ ಅಷ್ಟು ಹಣ ಇರಲಿಲ್ಲ ಎಂಬ ವಿಷಯವೂ ಗೊತ್ತಾಗಿದೆ.
ಇನ್ನೂ ಕೆಲವರು ಇದು ಮೂರ್ಖತನ ಪರಮಾವಧಿ ಎಂದಿದ್ದಾರೆ. ಕೆಲವರಂತೂ ಟ್ರೋಲ್ ಮಾಡಿದ್ದು ತನ್ನ ಗೆಳೆಯರಿಗೆ ಟ್ಯಾಗ್ ಮಾಡಿ ತನ್ನನ್ನು ವಿಮಾನ ಸಮೇತ ಹೂಳು ಎಂದು ಬರೆದುಕೊಂಡಿದ್ದಾರೆ.
