ಹೊಸದಿಲ್ಲಿ : ಭಾರತದ ಮಾಜಿ ಕ್ರಿಕೆಟ್ ಸ್ಟಾರ್ ವೀರೇಂದ್ರ ಸೆಹ್ವಾಗ್ ಅವರ ಪುತ್ರ ಆರ್ಯವೀರ್ ಕೂಚ್ ಬೆಹಾರ್ ಟ್ರೋಫಿಯಲ್ಲಿ ಗುರುವಾರ ದ್ವಿಶತಕವನ್ನು ಸಿಡಿಸಿ ಮಹತ್ವದ ಸಾಧನೆ ಮಾಡಿದರು.
ಶಿಲ್ಲೊಂಗ್‌ನ ಎಂಸಿಎ ಕ್ರಿಕೆಟ್ ಮೈದಾನದಲ್ಲಿ ದಿಲ್ಲಿ ತಂಡವನ್ನು ಪ್ರತಿನಿಧಿಸಿರುವ ಆರ್ಯವೀರ್, ಮೇಘಾಲಯ ತಂಡದ ವಿರುದ್ದ ಔಟಾಗದೆ 200 ರನ್ ಗಳಿಸಿದರು. ಅರ್ನವ್ ಅವರೊಂದಿಗೆ ಮೊದಲ ವಿಕೆಟ್‌ಗೆ 180 ರನ್ ಜೊತೆಯಾಟ ನಡೆಸಿದ ಆರ್ಯವೀರ್ 229 ಎಸೆತಗಳನ್ನು ಎದುರಿಸಿ 34 ಬೌಂಡರಿ ಹಾಗೂ 2 ಸಿಕ್ಸರ್‌ಗಳ ಸಹಿತ ಔಟಾಗದೆ 200 ರನ್ ಗಳಿಸಿದರು. ಡೆಲ್ಲಿ ತಂಡವು 2ನೇ ದಿನದಾಟದಂತ್ಯಕ್ಕೆ 2 ವಿಕೆಟ್‌ಗೆ 468 ರನ್ ಗಳಿಸಿ 208 ರನ್ ಮುನ್ನಡೆಯಲ್ಲಿದೆ.
ಆರ್ಯವೀರ್ ಅಕ್ಟೋಬರ್‌ನಲ್ಲಿ ವಿನೂ ಮಂಕಡ್ ಟ್ರೋಫಿಯಲ್ಲಿ ಚೊಚ್ಚಲ ಪಂದ್ಯ ಆಡಿದ್ದು, ಆಗ ಅವರು ಮಣಿಪುರದ ವಿರುದ್ಧ 49 ರನ್ ಗಳಿಸಿ ದಿಲ್ಲಿಗೆ 6 ವಿಕೆಟ್ ಜಯ ತಂದುಕೊಟ್ಟಿದ್ದರು.
