Ultimate magazine theme for WordPress.

ಕೊಹ್ಲಿಯನ್ನು ಔಟ್ ಮಾಡುವುದು ನನಗೆ ಕಷ್ಟದ ಕೆಲಸವೇ ಅಲ್ಲ; ಹೀಗೆ ಹೇಳಿದ್ಯಾರು ಗೊತ್ತಾ?

0

ಈಗಿನ ಕಾಲಘಟ್ಟಕ್ಕೆ ಹೋಲಿಸಿದರೆ ವಿಶ್ವದ ಶ್ರೇಷ್ಠ ಕ್ರಿಕೆಟಿಗರ ಸಾಲಿನಲ್ಲಿ ಮೊದಲ ಸ್ಥಾನ ಟೀಂ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿಗೆ ಎನ್ನಬಹುದು. ಇದಕ್ಕೆ ಇವರು ಬರೆದಿರುವ ದಾಖಲೆಗಳೇ ಸಾಕ್ಷಿ. ಐಸಿಸಿ ರ್ಯಾಂಕಿಂಗ್​ನಲ್ಲಿ ನಂಬರ್ ಬ್ಯಾಟ್ಸ್​ಮನ್​​ ಕೂಡ ಹೌದು.

ಕಿಂಗ್ ಕೊಹ್ಲಿ ಒಮ್ಮೆ ಕ್ರೀಸ್ ಕಚ್ಚಿ ನಿಂತರೆಂದರೆ ಅವರನ್ನು ಪೆವಿಲಿಯನ್​ಗೆ ಅಟ್ಟುವುದು ಅಷ್ಟೊಂದು ಸುಲಭವಲ್ಲ. ಹೀಗಿರುವಾಗ ಪಾಕಿಸ್ತಾನದ ಮಾಜಿ ವೇಗಿ ಶೊಯೇಬ್ ಅಖ್ತರ್, ನನಗೆ ವಿರಾಟ್ ಕೊಹ್ಲಿಯನ್ನ ಔಟ್ ಮಾಡುವುದು ಕಷ್ಟದ ಕೆಲಸವೇ ಅಲ್ಲ ಎಂದು ಬಡಾಯಿ ಕೊಚ್ಚಿಕೊಂಡಿದ್ದಾರೆ.

ಇನ್​ಸ್ಟಾಗ್ರಾಂನಲ್ಲಿ ಲೈವ್ ಬಂದಿದ್ದ ಅಖ್ತರ್, ‘ನಾನು ವಿರಾಟ್ ಕೊಹ್ಲಿಗೆ ಬೌಲಿಂಗ್ ಮಾಡಿದ್ದರೆ ಅವರನ್ನು ಹೇಗೆ ಸುಲಭವಾಗಿ ಔಟ್ ಮಾಡಬಹುದು ಎಂಬುದನ್ನು ತೋರಿಸುತ್ತಿದ್ದೆ’ ಎಂದಿದ್ದಾರೆ.

‘ನಾನು ಕೊಹ್ಲಿಗೆ ಬೌಲಿಂಗ್ ಮಾಡುತ್ತಿದ್ದರೆ, ಕ್ರೀಸ್‌ನ ಅಗಲಕ್ಕೆ ಹೋಗಿ ಚೆಂಡನ್ನು ಪಿಚ್ ಮಾಡುತ್ತೇನೆ. ಮತ್ತು ಆ ಎಸೆತವನ್ನು ಕೊಹ್ಲಿ ಡ್ರೈವ್​ನಲ್ಲಿ ಹೊಡೆಯುವಂತೆ ರೂಪಿಸಿ ವಿಕೆಟ್ ಪಡೆಯುತ್ತಿದ್ದೆ. ಇದು ವರ್ಕೌಟ್ ಆಗದಿದ್ದರೆ, 150 ಕಿಲೋಮೀಟರ್ ವೇಗದಲ್ಲಿ ಬೌಲ್ ಮಾಡುತ್ತೇನೆ ಆಗ ಅವರು ಔಟ್ ಆಗುತ್ತಾರೆ’ ಎಂದು ಅಖ್ತರ್ ಹೇಳಿದರು.

ಕಳೆದ ಕೆಲವು ದಿನಗಳಿಂದ ಶೊಯೇಬ್ ಅಖ್ತರ್ ಭಾರೀ ಸುದ್ದಿಯಲ್ಲಿದ್ದಾರೆ. ಇತ್ತೀಚೆಗಷ್ಟೆ ‘ಭಾರತ-ಪಾಕ್​ನಲ್ಲಿ ಕೋವಿಡ್ 19 ವೈರಸ್ ತಾಂಡವವಾಡುತ್ತಿದೆ. ಸಾವಿರಾರು ಜನರಿಗೆ ತೊಂದರೆಯಾಗಿದೆ. ಹೀಗಾಗಿ ಭಾರತ-ಪಾಕ್ ನಡುವೆ 3 ಪಂದ್ಯಗಳ ದ್ವಿಪಕ್ಷೀಯ ಏಕದಿನ ಸರಣಿ ನಡೆಸಬೇಕು’ ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದರು. ‘ಈ ಪಂದ್ಯಕ್ಕೆ ಸಾಕಷ್ಟು ವೀಕ್ಷಕರು ಸಿಗುತ್ತಾರೆ. ಇದರಿಂದ ಸಂಗ್ರಹವಾಗುವ ಹಣವನ್ನು ಕೊರೋನಾ ವಿರುದ್ಧದ ಹೋರಾಟಕ್ಕಾಗಿ ಅದನ್ನು ಎರಡೂ ದೇಶಗಳು ಸಮವಾಗಿ ಬಳಸಿಕೊಳ್ಳಬಹುದು’ ಎಂದಿದ್ದರು.

Leave A Reply

Your email address will not be published.