ಎಸ್​ಬಿಐ ಅಮೃತ್ ಕಳಶ್ ಸ್ಕೀಮ್ ಆಗಸ್ಟ್ 15ರವರೆಗೆ ಮಾತ್ರ; 400 ದಿನಗಳ ಅವಧಿಯ ಈ ಯೋಜನೆಯ ವಿಶೇಷತೆ ತಿಳಿದಿರಿ – Kannada News | SBI Amrit Kalash Fixed Deposit Scheme Last Date Soon, Know Details of This Special FD Plan

ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ ಫಿಕ್ಸೆಡ್ ಡೆಪಾಸಿಟ್ ಸ್ಕೀಮ್​ಗಳಲ್ಲಿ ಅಮೃತ್ ಕಳಶ್ ಫಿಕ್ಸೆಡ್ ಡೆಪಾಸಿಟ್ ಪ್ಲಾನ್ (SBI Amrit Kalash Special FD Scheme) ಬಹಳ ಮಂದಿಯ ಗಮನ ಸೆಳೆದಿದೆ. 2023ರ ಏಪ್ರಿಲ್ 12ರಂದು ಎಸ್​ಬಿಐ ಈ ಪ್ಲಾನ್ ಅನ್ನು ಘೋಷಿಸಿತ್ತು. ಮಾರ್ಚ್​ವರೆಗೂ ಈ ಸ್ಕೀಮ್ ಪಡೆಯಲು ಕೊನೆಯ ದಿನವಾಗಿತ್ತು. ಆ ಬಳಿಕ ಸತತವಾಗಿ ಇದರ ಗಡುವನ್ನು ವಿಸ್ತರಿಸುತ್ತಲೇ ಬರಲಾಗಿದೆ. ಇದೀಗ ಆಗಸ್ಟ್ 15ರವರೆಗೂ ಎಸ್​ಬಿಐನ ಅಮೃತ್ ಕಳಶ್ ಎಫ್​ಡಿ ಸ್ಕೀಮ್ ಪಡೆಯುವ ಅವಕಾಶ ಇದೆ. ಎಸ್​ಬಿಐನ ಎನ್​ಆರ್​ಐ ಗ್ರಾಹಕರಿಗೂ ಕೂಡ ಈ ಸ್ಕೀಮ್ ಲಭ್ಯ ಇರುತ್ತದೆ.

ಏನಿದು ಎಸ್​ಬಿಐ ಅಮೃತ್ ಕಳಶ್ ಎಫ್​ಡಿ ಸ್ಕೀಮ್?

ಅಮೃತ್ ಕಳಶ್ ಸ್ಕೀಮ್ ಎಸ್​ಬಿಐನ ಒಂದು ಫಿಕ್ಸೆಡ್ ಡೆಪಾಸಿಟ್ ಪ್ಲಾನ್. ಅದರ ಹಲವು ಅವಧಿ ಠೇವಣಿಗಳಲ್ಲಿ ಇದೂ ಒಂದು. ಇದರ ವಿಶೇಷತೆ ಎಂದರೆ ಇದರ ಡೆಪಾಸಿಟ್ ಅವಧಿ 400 ದಿನವೆಂದು ನಿಗದಿಯಾಗಿದೆ. ಅಂತೆಯೇ ಇದು ವಿಶೇಷ ಅವಧಿ ಠೇವಣಿ.

ಎಸ್​ಬಿಐ ಅಮೃತ್ ಕಳಶ್ ಸ್ಕೀಮ್​ನ ಠೇವಣಿಗೆ ಬಡ್ಡಿ ದರ ಎಷ್ಟು?

ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ 400 ದಿನಗಳ ಅಮೃತ್ ಕಳಶ್ ಎಫ್​ಡಿ ಸ್ಕೀಮ್​ನಲ್ಲಿ ಗರಿಷ್ಠ ಬಡ್ಡಿ ಕೊಡುತ್ತದೆ. ಮಾಮೂಲಿಯ ಗ್ರಾಹಕರಿಗೆ ಶೇ. 7.1ರಷ್ಟು ವಾರ್ಷಿಕ ಬಡ್ಡಿ ಇರುತ್ತದೆ. ಹಿರಿಯ ನಾಗರಿಕರಿಗೆ ಅರ್ಧಪ್ರತಿಶತದಷ್ಟು ಹೆಚ್ಚು ಬಡ್ಡಿಸಿಗುತ್ತದೆ. ಅಂದರೆ ಸೀನಿಯರ್ ಸಿಟಿಜನ್ಸ್​ಗೆ ಸಿಗುವ ಬಡ್ಡಿ ಶೇ. 7.6ರಷ್ಟಿರುತ್ತದೆ.

ಅಮೃತ್ ಕಳಶ್ ಸ್ಕೀಮ್​ನಲ್ಲಿ ಬಡ್ಡಿ ಹಣ ಪಾವತಿ, ಟಿಡಿಎಸ್ ಕಡಿತ ಇತ್ಯಾದಿ ವಿವರ

ಎಸ್​ಬಿಐನ 400 ದಿನಗಳ ಅಮೃತ್ ಕಳಶ್ ಸ್ಕೀಮ್​ನಲ್ಲಿ ಗ್ರಾಹಕರಿಗೆ ಸಿಗುವ ಬಡ್ಡಿ ಹಣಕ್ಕೆ ಟಿಡಿಎಸ್ ಕಡಿತ ಮಾಡಲಾಗುತ್ತದೆ. ಇನ್ನು, ಬಡ್ಡಿ ಹಣವನ್ನು ಠೇವಣಿಯಲ್ಲೇ ಮುಂದುವರಿಸುವ ಬದಲು ಗ್ರಾಹಕ ಖಾತೆಗೆ ವರ್ಗಾಯಿಸಲಾಗುತ್ತದೆ. ಮಾಸಿಕವಾಗಿಯಾದರೂ ಬಡ್ಡಿಹಣ ಪಡೆಯಬಹುದು. ಅಥವಾ ಮೂರು ತಿಂಗಳಿಗೊಮ್ಮೆಯೋ ಅಥವಾ ಅರ್ಧ ವರ್ಷಕ್ಕೆ ಒಮ್ಮೆಯೋ ಬಡ್ಡಿಹಣವನ್ನು ಪಡೆಯುವ ಅವಕಾಶ ಗ್ರಾಹಕರಿಗೆ ಇರುತ್ತದೆ. ಬಡ್ಡಿ ಹಣಕ್ಕೆ ಟಿಡಿಎಸ್ ಕಡಿತವಾದರೂ ಆ ಹಣವನ್ನು ಐಟಿ ರಿಟರ್ನ್ ಸಲ್ಲಿಸುವ ವೇಳೆ ಡಿಡಕ್ಷನ್ ಕ್ಲೈಮ್ ಮಾಡಬಹುದು.

ಅಮೃತ್ ಕಳಶ್ ಎಫ್​ಡಿ ಸ್ಕೀಮ್​ನಲ್ಲಿ ನೀವು ಠೇವಣಿ ಇಡುವ ಹಣ 2 ಕೋಟಿ ರೂ ಒಳಗೆ ಇರಬೇಕು. ಈ ಠೇವಣಿ ಮೇಲೆ ನೀವು ಸಾಲ ಕೂಡ ಪಡೆಯಬಹುದು. ಈ ಸ್ಕೀಮ್​ನಲ್ಲಿ ಎಫ್​ಡಿ ತೆರೆಯಲು ಆಗಸ್ಟ್ 15ರವರೆಗೂ ಕಾಲಾವಕಾಶ ಇದೆ.
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ ಶಾಖೆಗೆ ಹೋಗಿ ನೀವು ಅಮೃತ್ ಕಳಶ್ ಎಫ್​ಡಿ ತೆರೆಯಬಹುದು. ಅಥವಾ ಇಂಟರ್ನೆಟ್ ಬ್ಯಾಂಕಿಂಗ್ ಅಥವಾ ಎಸ್​ಬಿಐ ಯೋನೋ ಆ್ಯಪ್​ನಲ್ಲೂ ಈ ಎಫ್​ಡಿ ತೆರೆಯಬಹುದು.

Published On – 1:04 pm, Wed, 9 August 23